Acordos transformativos da UDC para publicar en acceso aberto: Springer

No mes de xuño de 2021 activouse o acordo asinado pola CRUE coa editorial Springer, que permite ao persoal investigador das institucións participantes (entre as que se atopan as tres universidades galegas, a través do CISUG) a publicación en acceso aberto nas 2.020 revistas híbridas de Springer&ADIS. O acordo finaliza o 31 de decembro de 2024.

Características do modelo:

• O modelo cobre o 100% das taxas de publicación (APC). O número de publicacións aceptadas dependerá do fondo establecido para cada universidade. 
• A data de aceptación do artigo debe ser posterior ao 15 de xuño de 2021.
• Tipoloxía documental aceptada: 
  • Artigos de investigación (OriginalPaper): artigos que normalmente presentan resultados novos. Tamén se coñecen como Investigación orixinal (OriginalResearch) ou Artigo orixinal (OriginalArticle/Paper).

NON están incluídos no acordo:

• Artigos de revisión (ReviewPaper): artigos que interpretan resultados publicados con anterioridade.
• Comunicacións breves (BreifCommunication): artigos breves coa mesma estrutura que os artigos estándar pensados para a súa rápida publicación.
• Formación continua (ContinuingEducation): artigos integrados na formación profesional, especialmente médica.
• Lista de títulos elixibles 
• Tipos de licenzas Creative Commons que se poden empregar:
  • CC-BY 
  • CC-BY-NC
• É obrigatorio empregar o correo electrónico da UDC.

NOTA: Actualmente, Springer engade de xeito automático o seguinte texto de agradecemento aos artigos: "Open Access Funding Provided", polo que neste caso non é necesario poñer ningún texto máis.

• Tras ser aceptada a publicación, o/a autor/a de correspondencia recibirá un correo coa ligazón ao formulario "My Publication", que deberá ser cuberto o máis axiña posible.
• Existen tres xeitos, por orde de preferencia, de que se recoñeza a elixibilidade no pago da APC:  

1. Seleccionar a institución: hai que introducir o nome da institución de afiliación na caixa "Your University/Institution" e seleccionar a opción adecuada. E o medio máis sinxelo.
2. Completar o formulario empregando o correo institucional, o que garantirá o recoñecemento automático como elixible.
3. Por último, tamén se usa a localización, ao utilizar a rede insitucional cando se cubre o formulario.

• Na primeira páxina do formulario hai que seleccionar a universidade/institución de afiliación.  
• Se o/a autor/a é identificado/a como elixible, aparecerá unha mensaxe de benvida con máis información sobre o acordo Open Access.
• Por defecto aparece marcada a opción Open Access, premendo na etiqueta "Yes, submit for approval" para continuar co proceso.
• Cando a institución confirme a aprobación do artigo, a editorial comunicará cun correo electrónico a publicación sen cargos. 
• No correo enviarase unha ligazón para seleccionar a licenza adecuada, que deberá ser lida e aceptada na plataforma. Tras completar o proceso, será posible descargar unha copia da licenza de publicación, a cal tamén se recibirá por correo electrónico.

Para calquera dúbida sobre os requisitos ou o procedemento para solicitar as APC, o enderezo de contacto é accesoaberto.biblioteca@udc.gal.