INFOguías: Guía de apoio para a realización do TFG: Avaliación da información

Avaliar a información

A avaliación da información é tan importante como o proceso de busca, xa que debedes asegurarvos que a información que utilizedes sexa pertinente e de calidade. Neste apartado sinalaremos algúns criterios mínimos que debedes ter en conta á hora de avaliar a información atopada, especialmente a recuperada da web.

Criterios de avaliación

AUTORÍA	Quen é o autor ou autora? A obra está realizada por un experto na materia? Cal é a súa filiación? Algúns sitios que, a priori, serían máis fiables son os sitios web de universidades e centros de investigación (por extensión, URLs de todo o domino .edu), de organismos públicos oficiais, de institucións culturais e científicas (museos, arquivos...), editoriais científicas e académicas coñecidas e prestixiosas, entidades e asociacións científicas, etc. Convén evitar foros e sitios de intercambio de opinións particulares.
CONTIDO	Documentan correctamente a información? Existen outras fontes fiables que corroboren os datos? Proporciona ligazóns de calidade ou referencias bibliográficas? Serán indicios de fiabilidade que o texto estea redactado de forma apropiada, que utilice unha linguaxe científica precisa, que xustifique as afirmacións mediante referencias bibliográficas, etc.
ACTUALIDADE	Aparece a data de publicación? Está actualizado? Segue vixente o contido? Pode haber outros indicios no texto, como datas citadas, noticias, datos, lexislación…
OBXECTIVIDADE	Trata o tema con profundidade e obxectividade? Ten publicidade comercial? Serán indicios de fiabilidade que non haxa sesgos ideolóxicos ou doutro tipo nin exceso de publicidade.

Táboa baseada en: Martínez Rodríguez, Luis Javier .Cómo buscar y usar información científica: Guía para estudiantes universitarios 2016.