Guía de apoio para a realización do TFG: Exposición e defensa

Para preparar a exposición oral do TFG ante o tribunal é importante planificar previamente o guión que se seguirá. Este debe de ter unha estrutura que permita ao tribunal seguir a liña argumental do que se está a expoñer:

1. Introdución: tómase contacto coa audiencia e expóñese brevemente o propósito do TFG e obxectivos
2. Desenvolvemento: explícanse os contidos con detalle e arguméntanse (inclúese a metodoloxía, os resultados obtidos e a súa interpretación)
3. Desenlace: expóñense as conclusións

É unha boa idea abrir e pechar a presentación con textos que sean "especiais": Os primeiros minutos serven para xerar interese na audiencia, e os minutos finais deben utilizarse para dar un peche no que se salienten conceptos que permitan recapitular os puntos máis importantes que se trataron ao longo da presentación. (Fonte: Biblioteca de la Universidad de Alicante)

Tamén hai que ter en conta o control do tempo asignado para realizala, que debe consultarse co titor/a ou na normativa do TFG de cada titulación. Ademais, recoméndase practicar previamente a exposición ante compañeiros.

Recomendacións xerais

• Sobre a linguaxe verbal
  • Falar nun ton e volume de voz alto e claro
  • Falar amodo pero con seguridade, sen titubear
  • Manter o ritmo, non perder o fío argumental nin facer longos silencios
  • Evitar os tics e muletillas (“ahh”, “ehh”)
  • Non ler literalmente a presentación. Utilizar as diapositivas como guión para expoñer o tema, así poderase demostrar que se entende e coñece o contido do que se está a expoñer.
• Sobre a linguaxe non verbal
  • Manter o contacto visual coa audiencia, non mirar ao baleiro

  • Utilizar xestos que acompañen o discurso e faciliten a comprensión. Por exemplo, utilizar as mans para salientar ou dirixir a atención sobre algo

  • Adoptar unha postura correcta

•  Ante as preguntas do tribunal
  • Escoitar con atención as preguntas ou comentarios  
  • Contestar con seguridade e argumentando as respostas
  • Demostrar un coñecemento sólido do tema, incluso utilizar as preguntas para afondar en aspectos adicionais non presentados na exposición oral

A maioría dos manuais recomendan realizar unha presentación de diapositivas (en PowerPoint ou Prezi) como complemento á exposición oral do traballo, que lle permita ao tribunal reforzar visualmente as ideas que se queiran destacar.

Unha boa presentación proporciona un valor engadido ao traballo, polo que é importante coidar a presentación do material que se vai a expoñer, o deseño tipográfico, etc.

Recomendacións xerais:

• Evitar as plantillas predeseñadas.
• A presentación debe ser simple, destacar os aspectos máis relevantes do traballo.
• Non sobrecargar as diapositivas con demasiada información textual. As mellores diapositivas son claras, sinxelas e só transmiten unha idea.
• Os gráficos ou figuras deben ser autoexplicativos, e empregaranse sempre que faciliten a comprensión, reforcen a presentación e aforren texto.
• Evitar as tipografías de fantasía e non abusar dos efectos especiais (transicións, animacións, etc.)
• Escoller unha cor de fondo neutra, buscando o contraste claro/escuro entre fondo e texto.

Nalgunhas titulacións, en lugar da presentación de diapositivas, elabórase un póster científico para facer a presentación e defensa do TFG. O póster é un resumo gráfico do traballo realizado e caracterízase pola súa calidade gráfica. Recoméndase seguir a seguinte estrutura:

Introdución + Obxectivo + Metodoloxía + Resultados + Discusión + Conclusións

Polo menos un 50% do póster debería ser contido puramente visual: iconas, gráficos, destacados…Algúns programas recomendados para elaboralo son Canva ou Piktochart.